Marcus Rashford បានទៅដល់ Barcelona កាលពីថ្ងៃអាទិត្យ មុននឹងបញ្ចប់ការផ្ទេរលក្ខខ្ឌខ្ចីជើងពេញមួយរដូវកាលពី Manchester United ។

សារព័ត៌មាន ESPN បានបញ្ជាក់ថា Rashford វ័យ ២៩ឆ្នាំ នឹងទទួលការពិនិត្យសុខភាពនៅដើមសប្តាហ៍នេះ ហើយប្រសិនបើអ្វីៗដំណើរការទៅតាមផែនការ នោះគាត់នឹងត្រូវបានបង្ហាញជាកីឡាកររបស់ Barcelona មុនពេលដែលក្លឹបចេញដំណើរទេសចរណ៍ប្រកួតមិត្តភាព។ 

Barcelona នឹងធ្វើដំណើរទៅអាស៊ីនៅថ្ងៃព្រហស្បតិ៍ ហើយគ្រូបង្វឹកលោក Hansi Flick ចង់ឱ្យ Rashford មានវត្តមានជាមួយក្រុមនៅប្រទេសជប៉ុន និងកូរ៉េខាងត្បូង ដើម្បីផ្តល់ពេលវេលាឱ្យគាត់បានច្រើន  តាមដែលអាចធ្វើទៅបាន មុនពេលរដូវកាលថ្មីចាប់ផ្តើមនៅខែសីហា។

Rashford ច្បាស់ណាស់ គឺបានធ្វើដំណើរទៅកាន់ Barcelona បន្ទាប់ពីក្លឹបបានបញ្ចប់ឯកសារចាំបាច់ទាំងអស់កាលពីថ្ងៃអាទិត្យ។ ខណៈដែលប្រភពក៏បានបញ្ជាក់ថា កិច្ចព្រមព្រៀងនេះ រួមបញ្ចូលទាំងជម្រើសក្នុងការទិញកីឡាករជាអចិន្ត្រៃយ៍ នៅរដូវក្តៅក្រោយ ក្នុងតម្លៃប្រហែល ៣០លានអឺរ៉ូ។  

Barcelona បានចុះហត្ថលេខាលើ Rashford ដែលជាគោលដៅចម្បងរបស់ពួកគេនៅរដូវក្តៅនេះ។ ដូចដែលលោក Deco បានលើកឡើងកាលពីខែឧសភា ហើយក្លឹបក៏បានព្យាយាមចុះហត្ថលេខាលើ Nico Williams និង Luis Díaz ផងដែរ។

ពីរសប្តាហ៍ចុងក្រោយនេះ Rashford មិនបានចូលរួមការហ្វឹកហាត់ជាមួយក្រុមឈុតធំរបស់ United ទេ បន្ទាប់ពីគ្រូបង្វឹកលោក Ruben Amorim ប្រាប់ថា គាត់មិនបានស្ថិតនៅក្នុងផែនការរបស់គាត់នៅ Old Trafford៕