Liverpool បានយល់ព្រមលើតម្លៃ ៦៩លានផោន ហើយអាចកើនឡើងដល់ ៧៩លានផោន នេះបើបូករួមជាមួយនឹងប្រាក់រង្វាន់បន្ថែមទៀត ដើម្បីចុះហត្ថលេខាលើខ្សែប្រយុទ្ធសញ្ជាតិបារាំងវ័យ ២៣ឆ្នាំ Hugo Ekitike ពី Eintracht Frankfurt។ 

ខ្សែប្រយុទ្ធដែលស៊ុតបញ្ចូលទីបាន ១៥គ្រាប់ នៅ Bundesliga កាលពីរដូវកាលមុន បានចុះហត្ថលេខាលើកិច្ចសន្យារយៈពេល ៦ឆ្នាំ គ្រោងនឹងពិនិត្យសុខភាពនៅថ្ងៃអង្គារនេះ។ 

នៅពេលដែលពិនិត្យសុខភាពចប់ Ekitike នឹងចូលរួមដំណើរទេសចរណ៍ប្រកួតមិត្តភាពមុនរដូវកាលរបស់ Liverpool នៅអាស៊ី ដោយគាត់នឹងចូលរួមជាមួយកីឡាករចំណូលថ្មីផ្សេងទៀត មានដូចជា Florian Wirtz, Frimpong, Kerkez និង Mamardashvili។ កិច្ចព្រមព្រៀងនេះ បានបង្កើនការចំណាយរដូវក្តៅរបស់ Liverpool ជិត ៣០០លានផោន ខណៈដែលក្រុមហង្សក្រហមក៏កំពុងសំឡឹងមើលឱកាសបញ្ចេញកីឡាករមួយចំនួនវិញផងដែរ មានដូចជា Núñez, Luis Díaz, Chiesa និង Elliott។  

Liverpool បានឈ្នះការប្រជែងចុះហត្ថលេខា Ekitike បន្ទាប់ពីកីឡាកររូបនេះ បានបដិសេធសំណើ ៧០លានផោន ពី Newcastle ហើយការផ្លាស់ប្តូរនេះ កើតឡើងបន្ទាប់ពីការប៉ុនប៉ងចុះហត្ថលេខាលើ Alexander Isak មិនបានសម្រេច៕