សារព័ត៌មាន Goal បានរាយការណ៍ថា ក្លឹប Napoli បានចាប់ផ្តើមការចរចាជាមួយកីឡាករ Rasmus Hojlund ដើម្បីនាំយករូបគេទៅកាន់ប្រទេសអ៊ីតាលី ខណៈដែលក្លឹប Manchester United កំពុងមានបំណងលក់ខ្សែប្រយុទ្ធសញ្ជាតិដាណឺម៉ាករូបនេះ មុនពេលទីផ្សារដោះដូរកីឡាករបិទបញ្ចប់។

យោងតាមអ្នកកាសែតល្បីឈ្មោះ Fabrizio Romano បានឱ្យដឹងថា Napoli បានពិភាក្សាគ្នាជាវិជ្ជមានជាមួយភ្នាក់ងាររបស់ Hojlund ហើយកីឡាករក៏មានឆន្ទៈចង់ត្រឡប់ទៅលេងនៅ Serie A វិញដែរ។ ទោះជាយ៉ាងណា ខ្សែប្រយុទ្ធរូបនេះបានដាក់លក្ខខណ្ឌមួយចំនួន រួមទាំងការធានាថានឹងបាននៅក្លឹបនេះយូរអង្វែង មិនមែនត្រឹមតែជាកិច្ចសន្យាខ្ចីជើងនោះទេ។ ការចរចារវាង Napoli និង Manchester United កំពុងបន្ត ខណៈដែល Man Utd ក៏ត្រៀមលក់កីឡាករដែលមិនសូវបានប្រើរូបនេះ។

កាសែត Corriere dello Sport បានរាយការណ៍កាលពីថ្ងៃអង្គារថា Man Utd ត្រៀមបញ្ជូនខ្សែប្រយុទ្ធវ័យ ២២ ឆ្នាំរូបនេះទៅលេងខ្ចីជើង ដោយមានថ្លៃឈ្នួលខ្ចីជើង ៥-៦ លានអឺរ៉ូ និងជម្រើសទិញផ្ដាច់ក្នុងតម្លៃ ៣៥-៤០ លានអឺរ៉ូ (ប្រហែល ៣០-៣៤,៥ លានផោន ឬ ៤០-៤៧ លានដុល្លារអាមេរិក)។ ក្រៅពីក្រុមម្ចាស់ជើងឯកអ៊ីតាលី Napoli នោះ ក្លឹប AC Milan ក៏ចាប់អារម្មណ៍ចង់បាន Hojlund ផងដែរ។

គួររំលឹកផងដែរថា Manchester United បានចុះកិច្ចសន្យារយៈពេលវែងជាមួយ Hojlund រហូតដល់ឆ្នាំ ២០២៨ កាលពីចុះហត្ថលេខាពីក្លឹប Atalanta ក្នុងឆ្នាំ ២០២៣ ជាមួយនឹងជម្រើសបន្តមួយឆ្នាំបន្ថែមទៀត ប៉ុន្តែរយៈពេលរបស់គេនៅប្រទេសអង់គ្លេសមិនសូវជោគជ័យប៉ុន្មានទេ។ កាលពីរដូវកាលមុន Hojlund រកបានត្រឹមតែ ១០ គ្រាប់ប៉ុណ្ណោះ ក្នុងការបង្ហាញខ្លួន ៥២ ប្រកួត ដែលធ្វើឱ្យមានមន្ទិលសង្ស័យជាច្រើនថាតើគេមានសមត្ថភាពគ្រប់គ្រាន់ដើម្បីជោគជ័យនៅ Old Trafford ឬយ៉ាងណា៕