មូលហេតុដែល Jadon Sancho បដិសេធមិនព្រមផ្លាស់ទៅ Roma ក្នុងលក្ខខណ្ឌខ្ចីជើង ហើយទិញផ្ដាច់នៅពេលក្រោយ ត្រូវបានលាតត្រដាងហើយ ដោយកីឡាករដែលមិនមានឱកាសលេងនៅ Manchester United រូបនេះ នៅតែស្ថិតក្នុងស្ថានភាពមិនច្បាស់លាស់នៃការផ្ទេរ។ ក្រុមបិសាចក្រហម ដែលអស់សង្ឃឹមក្នុងការលក់គេចេញនៅរដូវក្តៅនេះ ហាក់ដូចជាបើកចំហចំពោះសំណើរបស់ Roma ព្រោះវាមានកាតព្វកិច្ចទិញកីឡាករទាំងស្រុងនៅឆ្នាំ ២០២៦ ប៉ុន្តែកីឡាករជម្រើសជាតិអង់គ្លេសរូបនេះមិនត្រូវបានបញ្ចុះបញ្ចូលឡើយ។

យោងតាមលោក Fabrizio Romano តាមរយៈ GiveMeSport បានឱ្យដឹងថា Roma បានបង្ហាញចំណាប់អារម្មណ៍ក្នុងការចុះហត្ថលេខាលើកីឡាករវ័យ ២៥ ឆ្នាំរូបនេះ ដោយមានតម្លៃផ្ទេរ ២០ លានផោន (២៧ លានដុល្លារ) និងលក្ខខណ្ឌហាក់ដូចជាអំណោយផលសម្រាប់ក្រុម Man Utd។ ទោះជាយ៉ាងណាក៏ដោយ ការសម្រេចចិត្តរបស់ Sancho ក្នុងការបដិសេធសំណើនេះ ត្រូវបានគេរាយការណ៍ថា កើតចេញពីកត្តាចម្រុះ "កត្តាហិរញ្ញវត្ថុ និងបច្ចេកទេស"។

របាយការណ៍នៅក្នុង Corrierre dello Sport ក៏បានអះអាងទៀតថា តម្រូវការដ៏ច្រើនរបស់ភ្នាក់ងាររបស់ Sancho ក៏ជាឧបសគ្គផងដែរ ដោយមានការស្នើសុំកម្រៃជើងសារចំនួន ១០ លានអឺរ៉ូ (៩.៥ លានផោន / ១១.៦ លានដុល្លារ) ដែលបានធ្វើឱ្យក្លឹបដែលមានសក្តានុពលមួយចំនួនមានការភ័យខ្លាចរួចទៅហើយ។ តម្រូវការទាំងនោះបានធ្វើឱ្យក្លឹបកំពូលៗមួយចំនួននៅអឺរ៉ុប ដូចជា Atletico Madrid និង Juventus ដែលត្រូវបានគេរាយការណ៍ថា បានដកខ្លួនចេញពីការចរចា។ ចំណែក Roma ទោះបីជាពួកគេមានឆន្ទៈក្នុងការបង្កើនដែនកំណត់ហិរញ្ញវត្ថុរបស់ពួកគេក៏ដោយ ក៏ពួកគេឃើញខ្លួនឯងស្ថិតនៅផ្លូវបំបែក ដោយមិនប្រាកដថាពួកគេអាចបំពេញតាមចំនួនទាំងនោះបានដែរឬទេ៕