ក្រុមអ្នកគាំទ្រ Real Madrid មើលទៅដូចជាចាប់អារម្មណ៍ ចំពោះការប្រមាថ Kylian Mbappe ជាជាងការអបអរសាទរជោគជ័យរបស់ក្រុមពួកគេ ក្នុងការឈ្នះវគ្គផ្តាច់ព្រ័ត្រ​ Champions League កាលពីថ្ងៃអាទិត្យ។

ការ​សម្រេច​ចិត្ត​របស់​កីឡាករ​សញ្ជាតិ​បារាំង ​ដោយបដិសេធ​មិនចូលរួមជាមួយក្លឹបយក្ស​នៅអេស្ប៉ាញ​ ​បានស្ថិត​នៅក្នុង​ចិត្ត​អ្នក​គាំនៅឡើយ បើ​ទោះ​បី​ជា​ពួកគេ​ទទួលបានជ័យជម្នះនៅ​អឺរ៉ុប​ក៏ដោយ។

ក្រុមរបស់លោក Carlo Ancelotti បានវិលត្រលប់ទៅកាន់ទឹកដី Madrid វិញ​ ជាមួយនឹងពានរង្វាន់អឺរ៉ុបដ៏ល្បីល្បាញ បន្ទាប់ពីបានយកឈ្នះ Liverpool ដោយលទ្ធផល ១-០​ ក្នុងការប្រកួតវគ្គផ្តាច់ព្រ័ត្រនៅឯកីឡដ្ឋាន Stade de France កាលពីថ្ងៃអាទិត្យ។

ប៉ុន្តែនៅពេលដែលកំពុងចែករំលែកភាពអបអរសាទរយ៉ាងសប្បាយរីករាយ នៅទីសាធារណៈ គេសង្កេតឃើញថា ក្រុមអ្នកគាំទ្រមួយចំនួនធំ នៅតែមិនសប្បាយចិត្ត ចំពោះការត្រូវបានបដិសេធដោយ Mbappe ដែលបានបោះបង់ Madrid ដើម្បីបន្តអាជីពរបស់គាត់នៅ Paris Saint-Germain៕