អ្នកចាត់ការទូទៅរបស់ក្រុមបិសាចក្រហម លោក Erik ten Hag បានពន្យល់ពីមូលហេតុដែល Lisandro Martinez មានសារៈសំខាន់ចំពោះ Manchester United ដោយកីឡាករអាហ្សង់ទីនរូបនេះបានដើរតួជាចំណែកមួយយ៉ាងសំខាន់ចំពោះគំរោងរបស់លោក ten Hag។

សំណួរជាច្រើនបានដាក់មកលើ Lisandro ក្រោយការផ្ទេរមកពី Ajax Amsterdam ដែលកាលដើមឡើយ អ្នកគាំទ្រភាគច្រើនមិនសូវជាទុកចិត្តរូបគេដោយសារតែបញ្ហាកម្ពស់ទាបក្នុងនាមជាខ្សែការពារកណ្តាល ប៉ុន្តែកីឡាកររូបនេះបានធ្វើឲ្យអ្នកគាំទ្រពេញចិត្តជាខ្លាំង ដោយបានជួយកែប្រែមុខមាត់របស់ Man Utd បានច្រើន។

លោក Erik ten Hag បានលើកឡើងពីគុណភាពរបស់ Lisandro ដោយបាននិយាយថា "ខ្ញុំមើលឃើញថា Lisandro ជាកីឡាករល្អមួយ ថ្វីត្បិតតែទម្រង់លេងរបស់គេរាងកាច តែមិនមែនមិនសមស្របនោះឡើយ។ រូបគេជាខ្សែការពារ ហើយគេធ្វើបានយ៉ាងល្អ ទាំងជំហរ ការចូលរួមចំណែកជាមួយក្រុមជាដើម។ ខ្ញុំចូលចិត្តអត្តចរិតដែលគេមាន ហើយសង្ឃឹមថាយើងនិងអាចបន្តការងារជាមួយគ្នាទៅមុខរយះពេលយូរទៀត"៕