Manchester United បានចាប់ផ្តើមការប្រកួតកំដៅសាច់ដុំ មុនបើករដូវកាលថ្មីជាមួយនឹងជ័យជម្នះ ២-០ លើ Leeds United នៅកីឡដ្ឋាន Ullevaal Stadion ក្នុងទីក្រុង Oslo កាលពីថ្ងៃពុធ។

កីឡាករបម្រុង Noam Emeran រកបានគ្រាប់បាល់បើកឆាកសម្រាប់ក្រុមរបស់លោក Erik ten Hag ដោយបញ្ជូនបាល់ពីខ្សែបម្រើសញ្ជាតិន័រវេស Isak Hansen-Aaröen និងបានបំប៉ោងសំណាញ់ទីដោយការស៊ុតបាល់ទាបនៅនាទី៦៧។ 

Emeran ដែលជាខ្សែប្រយុទ្ធសញ្ជាតិបារាំងវ័យ២០ឆ្នាំ ក៏បានចូលរួមចំណែកក្នុងការរកគ្រាប់បាល់ទីពីររបស់ United​ ផងដែរ ដោយធ្វើឡើងពីកីឡាករបម្រុង Joe Hugill សម្រាប់ការស៊ុតបញ្ចូលទីយ៉ាងកៀកទី ដើម្បីបញ្ចប់ជ័យជំនះនៅនាទី៨១។

ការប្រកួតនេះ បានបង្ហាញពីវត្តមានលើកដំបូងជាមួយនឹងការពាក់អាវរបស់ United សម្រាប់ខ្សែបម្រើសញ្ជាតិអង់គ្លេស Mason Mount បន្ទាប់ពីផ្ទេរពី Chelsea៕