Manchester City បានកំណត់អត្តសញ្ញាណតារាឆ្នើមម្នាក់របស់ Stade Rennes គឺកីឡាករ​ Jeremy Doku ដែលជាគោលដៅល្អបំផុត ដើម្បីជំនួសតំណែង Riyad Mahrez នៅរដូវក្តៅនេះ។

Jeremy Doku ក្នុងវ័យត្រឹមតែ២១ឆ្នាំ​ប៉ុណ្ណោះ គាត់​ត្រូវ​បាន​គេ​ចាត់​ទុក​ថា​ ជា​អ្នក​មាន​ទេព​កោសល្យ​ដ៏​ល្អអស្ចារ្យ​ម្នាក់ ដោយរកបាន៨គ្រាប់ក្នុងរយៈពេលត្រឹមតែ១២០០នាទី​ សម្រាប់ការលេងនៅ Stade Rennes​ ។ 

City ទើបតែបានឈ្នះពាន៣ក្នុងប្រវតិ្តសាស្រ្ត ប៉ុន្តែបានបាត់បង់កីឡាករសំខាន់ៗ ជាច្រើននាក់រួចទៅហើយ នៅរដូវក្តៅនេះ​។ កីឡាករ​ Riyad Mahrez បានចូលរួមជាមួយ Al-Ahli ក្នុងការផ្លាស់ប្តូរតម្លៃ៣០លានអឺរ៉ូ ព្រមទាំងប្រធានក្រុមកីឡាករ Ilkay Gundogan បានប្តូរទៅកាន់ Barcelona ដោយឥតគិតថ្លៃបន្ទាប់ពីកិច្ចសន្យារបស់គាត់នៅ Etihad ផុតកំណត់។

អនាគតរបស់ Bernardo Silva និង Aymeric Laporte ក៏ស្ថិតក្នុងភាពស្រពេចស្រពិលផងដែរ ដោយកីឡាករទាំងពីររូបមានបំណងចាកចេញពីក្លឹបនៅរដូវក្តៅនេះផងដែរ៕